Sermon - Sual a punna apiangah khawngaihna a pung leh zual thin

Sual a punna apiang ah khawngaihna a pung leh zual thin
Rom 5:20

- Kristian Lalramenga

Kan rama thil thang duang pawl tak chu ‘SUAL’ hi a ni ngei ang. Sual hi a tam khawp a,”Fel lohna zawng zawng hi  sual chu a ni.”( I John 5:17)

Kan ram mipui hi han khaikhawm tai la, Sorkar hnathawk leh Kut hnathawk a eizawng kan ni mai a, Sorkar hnathawk lungawi lo an nuar, Kut hnathawh lah bang bik lo, lungawina reng reng hi a awm ta lo a nih hi. Chutih rualin sualna leh fel lohna a pung a, mi lungawi lo an pung a, lawmthu sawi thawm a reh veng veng a ni ber e.
    Kohhran boruak lamah chuan Crusade leh Camping thawm nei tawk chu kan awm ve reng a, Kohhran tam zawk nun erawh a harh lem lo. Tawngtai kan uar sawt ta hle a, Kohhran member pumpui ngaihtuah chuan tawngtai thin chu kan tlem pharh lo maw? Programme kan ngah em em a, kan hlim phah lem lo, thil tih tak tak na kan tla chham ta hle mai. Tual thi an pung a, eiruk a hluar a, sual pal zutna a nasa ta hle a nih hi.
    Sual a punna apiangah khawngaihna chu pung ve turin Bible-ah kan hmu a, mahse khawngaihna chu misual te chungah a pung ve si lo. Hei hian sual kan huatna a tlem tawh zia a entir a, misual chungah khawngaihna thlentir a tulna kan hmu tam lo tih a tilang bawk . Lal Isua hnapui ber chu misual hnena chanchin tha, khawngaihna thlentir hi a ni si a. Kan Lalpa Isua hnung zui hi kan tlin lo hle chu a ni tih hihai rual a ni lo. Kan ram, Kristian ramah hian sual chi hrang hrang chu kan hmuh  leh hriatah a pung chak hle a. Pathian ringtute min chona nasa tak a ni tih pawh kan pawm a hun khawp mai. Sual ral chu lo lian zel mahse Hnenhtu Lalpa kan nei tih hria a, Lal Isua hming a sual do hna kan thawh a hin tak zet zet tawh a ni lawm ni? Lal Isua khawngaihna hmang a misual enkawl kan ba  ni lawm ni? Biak In a kan hlim leh lawmnate hi tawp pui mai lo a, daiah te chhuak a Lalpa tlanna hrelo hnena Chanchin tha puan hi ringtu te hian kan tih tur a ni dawn lawm ni? Nang leh kei hi chu khawngaihna leh ngaihdamna hmang a rawngbawl tura koh kan ni si a. Sual a punna apiangah Pathian khawngaihna a pung a ni tih hi riangtu nunah chiang mawlh rawh se.
    Kan fa, unau, nu leh pa te sualna chuan min tibeidawng fo thin em? An mahni ah beisei tur kan hmu tawh lo a ni thei e, Mahse an tan Lalpa beisei ila, an tan Lalpa a tha reng tih theihngilh lo ang u. Kan fa, unau, nu leh pa beiseiin tawngtai suh. Lalpa chu an tan beisei la hnenah tawngtai zawk rawh.Misual beiseina chuan bei dawnnaah min hnuk lut a, Lalpa bei seina chuan misual a siam tha thin ani.