SAY Sport hlimawm taka hman a ni

Enna Corps SAY te chuan zirtawpni(19/4/2013) zan atang khan sport hlimawm tak mai kan nei tan a, ni 19(Friday) zan dar 7 khan Bethlehem Indoor Stadium ah Badminton hmang infiamna hun tan a ni. Infiamna hun tanna leh a hawn nan U Mami chuan Pathian hnena inhlanna hun hmangin a tawngtai a, hemi hnu hian infiamna chu tan nghal niin, Group hnih, Lalkaithanga Brigade leh Kawlkhuma Brigade te chuan Badminton an khel a ni.

Badminton inkhelhah hian mipa leh hmeichhia double team siam ve ve a ni a, Court hnihah a ruala khelh niin inkhelh hi a hmuhnawm hle a ni. Inkhelh hmasa lamah hian Kawlkhuma Brigade mipate an che tha hle a, amaherawh chu Semifinal-ah an chet chhiat deuh avangin an champion zo ta lo a ni.

Hmeichhe khel pawh a hmuhnawm khawp mai, an tang tlang bawk a, khel thang lo mah nise an theih tawka an han tang a thahnem ngai taka an han khel chu a

hmuhnawm dangdai kher mai. Kan hlim tlangin kan tang tlang bawk a a nuam kan ti tlang hle. Hmeichhe lamah pawh hian Lalkaithanga Brigade te an champion leh bawk a, hemi zan zet chu Lalkaithanga Brigade Nite a ni ringawt mai. Mipa leh hmeichhiaah Gold Medal an la ve ve a ni.

Hemi zana inkhel ho chu an sil hlawm bawk a niang, a tuk zing(inrinni) a lo thlen meuh chuan "nizan ka inkhel chu ka sil ngei mai, ka ban, ka chawn, ka taksa pumpui hian ka na vek" te an ti deuh fur mai a!!! A chhan pawh khel ngai lo tak tak te kan nih hlawm avang..... inkhel thang ho tih loh chu kan na tlang hle a ni.

Inkhelhpui ni, Inrinni-ah zing dar 9:30 velah Biak In kawtah innghak khawmin infiamna hmun tur lam kan pan a, chhunah PUC Field lamah infiamna sport hrang hrang chhunzawm a ni leh dawn ta. A hmunah thei tui duh tawka in tur kan chhawp a, Tiffin kan pai theuh bawk a: thleng hmasa ten thil tul apiang an lo ti fel bawk a. Field kan thlen kim hnu chuan Pathianna inhlanna hun te hman zawh anih hnuah infiamna chu kan tan ta a. A hmasa berin 100 meter race Mipa tan a ni a, group hnihte atangin pathum ve ve kan inthlang chhuak a, hetah hian Kawlkhuma Brigade te chuan Gold leh Bronze an la a, Lalkaithanga Brigade ten Silver pakhat an la thung a ni.

Football mipa khelh chhunzawm a ni a, inkhelh tan a ni a an innawr tawnin an inhneh tawk char char hle mai! Lalkaithanga Brigade te hian goal an thun teuh thei hle mai, defender te an rawn pal tlang fua fua mai a, Kawlkhuma Brigade te hi an tlawm mai ang a tihtur khawpin an rawn hrang a, amaherawhchu Kawlkhuma Brigade te hian tlawm mai an tum loh zia tih lan nan an han nawr let ve leh tak tak a Lalkaithanga Brigade te goal-ah pawh an shoot ta pawp pawp mai a. Goal Post zawn lo tak takah pawh an shoot ta thuai thuai mai a, tum khat phei chu kawh tha zet maiin goal post ah chuan an pet lut a, vanduaithlak takin an goal keeper Biaktea chuan a lo safe hlauh mai a. First half ah chuan a tu zawk mah mah chuan goal an thun thei lova, hun a tawp short break reilote neih anih hnuah second half chhunzawm leh niin hetah zet chuan Kawlkhuma Brigate te chuan tan an la tak tak a, an position leh formation te an han tidanglam a goal khatna chu an khung ta nghal mai a. Sunstitution te an han siam a mahse eng an ang thei ta chuang lova, kar lova chuan Kawlkhuma pawlte chuan a goal hnihna an thun leh ta mai a. Lalkaithanga pawlte chu an zam deuh emaw tih mai tur hian an zuai deuh tan ta tlat mai. Goal dang thun belh lehin Kawlkhuma Brigade te chuan an position te an han thlak kual vel a. Lalkaithanga Brigade te pawh chuan an substitution chhuanvawr U Mawia chu an luh tir ve leh a, an chet that phah viau nghe nghe niin a lang, KK Brigate te goal hnaih tak takah chuan an khalh phei ta fua fua mai a. Chutia eng emaw chen an han khalh kual hnu chuan an goal khatna chu an thu ve ta mai a. An goal khat chuan chona a rawn pe thar leh ta, inkhelh pawh a tang tha tan leh tawh viau mai le. Kawlkhuma pawlt chuan player tinten goal kan khung theuh dawn tiin an striker te chu an han in change kual vel a, nimehsela an duh ang chuan an che thei bik hauh lo mai le. Hun eng emaw chen chutia an in chai laih laih hnu chuan hun a lo tawp ta. Hnehna chu Kawlkhuma Brigade ten an chang ta  a ni. Hmeichhe Football erawh khelh ve a ni lo.

Football khelh zawh hian reilote kan chawl hahdam a, chumi hnuah kan tiffin te hawngin chhun chaw kan fak ta a, kan hlim tlang hle mai. Kan Tiffin te kan keng khawm a, a hote te ten kan ei khawm a, chawhmeh chihrang hrangte kan han in share tlang chu a nuamin chaw ei a tui duh khawp mai. Kan in ei puar peng pawng tawh bawk a chauh a rehin kan harh hawk hlawm mai, eng emaw chen kan han chawlhhahdam hnu chuan Poison Ball ti turin kan inbuatsaih leh ta a. Mipa leh hmeichhia inthlan pawlhin Kawlkhuma Brigade te lut hmasain Lalkaithanga Brigade ten ball an chang a, minute thum chhunga dam hnem(thi tlem) zawk zawk chaka puan tur an ni a, hun tawp thlengin KK Brigade te hi pathum an dam a, LK Brigade te an lut ve leh a hun tawp thlengin pathum an dam ve leh bawk a. An inhnehtawk avangin minute khat ve ve hmanga in el/tum leh a ni a, hetah hian Lalkaithanga Brigade te chu an chak ta ni.

Volley Ball hmeichhia neih chhunzawm leh a ni a, hetah hian Kawlkhuma Brigade te chuan set hnih la zawnin chakna an chang a, mipa volley ball khelh chhunzawm veleh nghal a ni a, set khatna KK Brigade ten an la a, set hnihnaah LK Brigade te an chak ve leh a, a set thumna, final game ah hian Lalkaithanga brigade te hi an chak ta a ni.

Infiamna dang pawh khelh tura ruahman nimahse hun te kan ngah tawk loh avangin kan khel thei ta lova, heti chung pawh hian kan hlim tlangin hlawkthlak kan ti hle a ni. Kan hmabakah Bial sport kan la hmabaka member te pawhin hemi hun atan hian tan lo la ila, lawmman lak ngei kan tum dawn nia.

Kan sport lawmman semna function/programme hi Monday zan(22nd April) SAY Meeting-ah kan nei dawn a, hemi zan hi Musical Nite ang a hman a ni dawn bawka ni. Zaithiam tak takte zai kan ngaithla ang a, group zai leh solo te kan ngai thlain intihsaikna te pawh kan la nei dawn a,a endiktu tur pawh kan ruat fel vek tawh a ni. SAY member zawng zawngte hemi zan hian kal theuh kan tum dawn nia. Eitur tuihnai tak a awm dawn bawk a ni. 

Report thenkhat chu 'Enna Arsi'  Issue No.13 Dt. 21/3/13 ah chhuah a ni.