Sermon - An sual chhuanlam an nei ta lo

An sual chhuanlam an nei ta lo

- Pu F Hrangzama

Bethlehem Veng

Pathian thutak kan hriat theihna turin sual nei saa piang, mi sual kan ni tih mahni inhriat chian a pawimawh hmasa ber a.”Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni….”Thil ka tisual lo”, kan tih chuan amah(Pathian)chu dawtheiah kan siam a, a thu pawh keimahniah a awm lo a ni, tiin Bible- in min hrilh chiang hle (1 Joh.1:8-10).

Pathianin mihring a siam khan sual nei sain a siam si lo va, sual hi khawi atanga lo awm tan nge? Engtin nge mihringah a lo awm, tih hi hriat a pawimawh tak meuh a ni. “Aw ‘varparh’’zing lam fapa’,engtizia nge van ata i tlak tak chu le!...... (Is.14:12-17).” Tin vanah chuan indona a lo awm a…..drakon lian pui, rulpui tar Diabola leh Setana an tih, khawvel zawng zawng bumtu chu an paih thla ta a; leiah an paih a, a tirhkohte pawh an paih thla tel ve a….”(Thup.12:7-12;IIPet.2:4;Jud 6).
Chu drakon lian pui, rulpui tar, Diabola leh Setana an tih, khawvel zawng zawng bumtu-vantirhkoh zinga mi chuan mahni nihna pawm lova Pathian aia chungnung zawka awm a tum avangin Pathian a do ta a.  Paih thlaka a awm hnuin  Pathianin Ama anpuia a siam mihring tihdera

titlutu ‘rul’hnathawh kha mihringa sual lo awm tanna, sual bul chu a ni. Chu mi avanga Evi leh Adama khan ’a chhia leh a tha hriatna’thing rah an ei tak  atang khan anmahniah rul hriatna, dan danglam tak(Rom 7:14-25) a lo nun tak avangin Eden pawn lamah Pathianin a hnawt chhuak ta a nih kha(Gen.3:1-24).

Chutianga mihringah Pathian hmelma nun Adama atanga sual kan inrochun chhawn zel avangin Pathian mithmuhah chuan kan felna zawng zawngte pawh silhfen bawlhhlawh ang lek kan ni  a (Is.64:6). ”LALPA chuan leiah hian mihring sualzia chu nasa tak a ni, an rilru suangtuahzia reng reng chu sual hlir a ni fo mai.Leiah hian mihring a lo siam tak avangin LALPA chu a inchhir a, rilru nat nan a hman phah ta a.”He bung leh changah hian LALPA Pathianin mihring a lo siam tak avanga a inchhir thu vawi hnih meuh kan hmu a ni(Gen.6:5-8).

Pathianin Nova hun laia mite, Sodom leh Gomora khuaa mite an sual em avanga tui tileta, mei leh kata a tihhlum tak vekte kha eng ang fakauva sual nge an nih? An va han sual bik awm em em ve maw le! kan ti a ni mai thei e. Isuan, chung hun laia thil thleng chu hetiang hian min hrilh a ni, “…an zaa a tihhlum vek ni kha a thlen hma loh zawng, an eiin an bar a, nupui pasal an innei thin a. Chutiang bawkin Lota dam lain a lo awm; an eiin an bar a, an leiin an hralh a, an chingin an sa thin a” tiin (Luka 17:26-29). He thu hi ngun takin han ngaihtuah ila,suala tlu tawh mihring nunphung pangngai ve reng, tun lai khawvel hun ang tho hi niin a lang.

Zoram khawvelah pawh hian kan eiin kan bar a, nupui pasal kan innei thin a; kan leiin kan hralh a, kan chingin kan sa ve bawk thin. Mi tupawhin harsatna leh hrehawmna laka tal chhuah a, zalenna leh nawmsakna te, damkhawchhuah theihna tur zawngin mahni kawng kawngah kan vak theuh a. Amaherawhchu, chutianga kan khawvel nun leh hun kan hman meknaah hian kan duhkhawp kan hmu ngai lo va, sual kan nei reng a ni tih pawh kan inhre chuang lo.Tun laia Zofate hi han inbihbih chiang ila, mite sawi leh sawi hnu; hmeichhiat mipatna lamah te, uirena te, rukrukna te, pawngsual te, tualthahna te, hurna te, awhna te, itsikna te, chapona te  etc.inpawngnekna leh inramnain kan khat a, Nova leh Lota hun laia mite aia kan that zawkna a awm chuang lo. “Seol chuan a duhna chu a lo tizau va, a ka chu teh rual loh khawpin a ang ta a: tichuan an ropuina te, an mipui te, an ropui bung bungna te, an zinga lawm taka awmte nen chuan an lut thla ta duah duah a”(Is.5:14), a tih hi tun laia Zoram khawvel nunphung ang tho hi niawm tak a ni. Sual nei reng chung si a, mi mithmuha mi fel tak  anga kan lan dan te hi a va zahthlak em!…”Mihring zinga an chawimawi chu Pathian mithmuhin tenawm tak a ni si”(Luka 16:15).

Pharisaite leh lehkha ziaktuten hmeichhe pakhat a uire lai tak an man, Isua hekna tur an hmuh theih nan a hnenah an hruai a,”Zirtirtu, he hmeichhia hi a uire lai an man a ni, a uire lai takin. Dan Lehkhabuah, Mosian hetiang mi hi lunga den hlum thu min pe a; nangin engtin nge i ngaih?”tia an zawh sek sek avangin Isuan an hnenah,”In zinga sual nei lo apiangin amah chu lungin deng hmasa rawh se,”a ti ta a.Nimahsela, pakhat khatin an relh chhuak ta vek a. ‘In zinga sualna nei lovin deng hmasa rawh se,’ ti sela chuan hmeichhia kha rang mangkhenga den hlum an chak dawn lutuk. Den hlum tumtu zawng zawng khan Isua thu sawi avangin sual an nei a ni tih an inhre chiang hle tihna a ni (Joh.8:3-9).

“Kei lo kalin an hnenah thu sawi suh ila, sual an nei lo tur; tunah erawh zawng an sual chhuanlam tur an nei ta lo a ni,”(Joh.15:22)tih hi tunah pawh a la pangngai reng a,sual kan nei reng a ni tih hi Krista Thu avangin kan hre thei chauh a ni. “Tuin nge mahni tihsualte hre thei ang? Sual inthupte lakah hian mi tifihlim ang  che”(Sam 19:12). “En teh u,Pathian Beram No,khawvel sual kalpuitu tur saw!”(Joh.1:29) tia Johanan a sawi ang khan Pathianin Isua Kristaah kan sual zawng zawng min nghahsak a,’kan thih ai min thihsak’ a (Rom 14:15), Ama nun thianghlim min pe ta zawk a ni. “Tupawh thi tawh chu sual lakah a chhuak tawh si a” (Rom 6:7).

Chuvangin kan Pathian chuan sual laka kan fihlim tihtheihna tur leh Thutak kan hriat theihna turin, felnaa riltama tuihal turin min duh a ni.Mihring tihlawm nge kan tum,Pathian tihlawm?Amah lovin engmah kan ti thei si lo va, Amah lova thil kan tihtheih viau chuan Pathian kan mamawh lo hle tihna a ni. “Ama lawmzawng atana tih tum tur leh bei tura nangmahnia thawktu chu Pathian a ni si a” tiin min hrilh (Phil.2:13)….Amen.