Sermon - I Tawngtai fo ang u

I Tawngtai fo ang u

- PC Lalthlahliana

Speaker - Delegate for Christ

“Mihring fapa hma a ding tlak a ruat  innih theihna turin, englai pawhin

tawngtai chungin ngaih ven rawh u.”   -   Luka 21:36

Tunlai hian Mizo Kristiante zingah tawngtai hlutna leh pawimawhnate leh thiltihtheihzia hre chiang kan lo pung ta zel a, a lawmawm in a thlamuan thlak ta hle mai. Mi tam tak chuan tawngtaina hi an nunna hnar pawimawh a ni tih an chiang em em a, Chawnghei a tawngtai peih tak tak, fianrial a tawngtai taima leh thlahlel an pung zel a. Mahni tan pawh ni lo mite tan taima tak a tawngtai thin mi thahnem tak an awm mek bawk a. Tluk loh rim an nam hle mai.

Hetih mek lai hian ringtu fell eh tha tak tak ang a lang, Kohhran a nihna nei mai pawh nilo, thunei tak tak nisi Tawngtai ngaisang lo leh ngei pawimawh lo fe fe te, Tawngtai inkhawm zan leh zingkarah pawh kal tul ti lem lo an tam hle mai bawk a. A pawiin a vanduai thlak hle in ka hria. Engvang ngeni ang le? Heng mite hi an piangthar lo nge? Tawngtai pawimawhna an hre  lo hrim hrim em ni ang le? Nge an hrisel a, sum an ngah tawk a Lalpa an mamawh lo em ni ang le? Nge an tawngtaina a hlawhtling ve ngai lo in, chhanin an awm ngai lova an beidawng tawh zawk em  ni le? A! a chhanna chu an mahniin an hria ang chu.Unua duh tak, nang chuan hei hi ngeih thah lul suh ang che aw. Tawngtaina hi Ringtu nunna a pawimawh ber a laimu a ni si a. In chhui zui hlek dawn teh ang.

Danial-a atang hian lo tan dawn ila, Laldaria Media mi in Belsazara a chapona avanga a thih hnu a Kaldai Lalber a lo nih khan Daniala chu an ram a roreltu 120 chunga thuneitu 3 te zinga pahkhat ah ruat a nih a, Puan senduk leh rangkachak te a chawimawina ropui tak nena chawimawi a ni chung pawh khan, A Pathian, Van Pathian biak leh chibai buka bang chuang lova, Lalber Daria nilo Chibai buk leh tawngtai chu sakeibaknei puk a paih tur a ni tih hre reng chung pawh khan, Jerusalem lam hawia tukverh hawngin nitin thingthiin vawithum a tawngtai ziah thin tih kan hria a. A ni hi chuan Pathian aia hlauh a nei lova, a chibai buk chu thihna pawh nise, a tawngtai chu a basan duh chuang lo tih kan hria. A entawn tlak zia hi kan sawifiah phak lo. Pathian mihriat dik tak chu eng mi pawh ni ila, Rinna lama kan nihna tichiangtu chu Pathian hnena tawngtai kan ngaih pawimawhna hian a tichiang thin a ni.

A nih leh Thuthlung thar lamah in lut ve leh the ang aw.Kan Lalpa, Pathian fapa meuh kha a tawngtai zankhua thin tih kan hriat kha! Olive tlangah chuan tunlai tawng takin a Bethel fo thin a nih kha? Kan Lal Isua hian tawngtai a ngaihpawimawh zia kan hria em? Tawngtai hun pangngaiah chuan a hun takah Biak Inah a kal a atawngtai thin tih kan hre bawk a.

Isua zuitu a zirtirte lo en leh ila, Peter-ate, Paul-ate atang hian tawngtai chu an ngai pawimawh em em a ni tih hi zep thu a cheng lo ang chu ( Eph 6:18, Rom 12:12, TT 16:16, TT 4:31) Kan sawi zo seng chuang lo ang, ringtu tan chuan hna leh tihtur tul hmasa a nih kan hre thei a ni.

Awle, a sei lutuk loh nan kan chang tar chhuah kha I lo ngaihtuah the ang u le, Isuan a sawi ang hian Mihring fapa hmaah chuan engtikah emaw chuan kan la dingdawn a, tahchuan, chutih hunah chuan maw, ding tlak leh tlak lo kana wm dawn tih a hriat sa a . Ding tlak lo nih chu thil duhawm lo ber a ni ngei ang. A rapthlak dan tur pawh kan mitthla thiamin ka ring. Amah Isua ngei khan duh sak takin min hrilh a : Chu chu Englai pawha ngaihven chunga ‘Tawngtai’ hi ani e. Unau duh tak, enge I dinhmun le? Ka sawm a che I tawngtai ve thin em le? Zing, chhun leh zanah I tawngtai ve thin ang aw. Tichuan Mihring fapa hmaah dingtlak kan lo ni dawn a ni.