Sermon - PAWNG LAK - F.Hrangzama

PAWNG LAK

- Pu F.Hrangzama

Enna Corps

“Baptistu Johana awm achin tun thlengin van ram chuan beih vakna a tawk thin a,

a bei vakte chuan an pawng lak thin”(Mt. 11: 12) 

“Baptistu Johana awm achin tun thlengin van ram chuan beih vakna a tawk thin a, a bei vakte chuan an pawng lak thin”(Mt. 11: 12). Tun hma deuh atang khan he thu hi Mizo Kristian tthenkhat chuan, “Van ram chu theih tawp chhuaha kan beih vak chuan  pawng lakin a luh luih theih,” tiin Luka 16:16 thu (Dan leh zawlneite thu chu Johana lo awm thleng khan a awm a; chu mi achinah chuan Pathian ram Chanchin Tha hi an hril a, mi tin an lut lui theuh va) hi changchawiin an sawi fo thin.

    Mi thenkhat chuan, “Kan duh thlanna ngeiin theih tawp chhuaha thil tha kan tiha, a thu kan awiha, thil sual kan khawih loh chuan van ram chu a pawng lak theih, kan duh thlanna a pawimawh; i thuin thiamin i awm ang a, i thuin thiam lohvin i awm ang,” tiin an sawi ve bawk thin. Chutiang chu ni thei tak tak ta sela, mi felte leh mi fingte, mi chakte leh mi

thil titheite, mi insum theite leh mi thate tan van rama luh chu thil harsa lo tak a ni ngei ang. Tin, mi chak lote leh mi bawrhsawmte, nausente leh naupangte, tar chakvak lote tan chuan van rama luh ve ngaihna a awm hauh lo vang.

    Tin, kan duh thlan ang ang leh kan thu thua Pathian thlanga piang thar thei mai ni theuh ta ila, Pa Pathianin Isua Kristain chhandamna min buatsaihsak pawh a tul hauh lo vang. Chutiang chu Pathian thil tum a ni lo hrim hrim. ‘Boralte zawnga chhandam turin Mihring Fapa hi a lo kal a ni reng a ni,’ tih hi a awmzia i zir thar leh theuhangu. ‘Pawng lak’  tih hi thil namen a ni lo va, mi duh lo chung chung an nunna lak luihsak (by force) sawina a ni a, thil rapthlak tak a ni. Van ram/Pathian ram (nun Krista) neitute chu Isua Krista ring lotute leh a thu awih lotuten tharuma bei vakin an nunna an lak luihsak (pawng lak) thin thu a sawina a ni. Isuan a zirtirte hnenah Baptistu Johana thu hetiang  hian a sawi a, “Ka hrilh a che u,  Elija chu a lo kal tawh reng a ni, amah chu an hre lo va, a chungah an duh duhin an ti ta zawk a. Chutiang bawkin Mihring Fapa pawh hian an lakah a tuar ve dawn a ni,” a ti a (Mt. 17: 12). Isuan amah ngei pawh pawng lak a nih tur thu a sawi tihna a nih chu.

Tun tuma kan thupui awmzia hi Marka 6: 17- 29; Mt.14: 1- 12  thu atang hian chiang takin a hriat theih. Heroda khan a unau Philipa nupui (Herodi) a neihsak thu-ah Johanan a hnenah, “I unau nupui i neih sak (chhuhsak) hi a thiang lo a ni,” a ti a. Chuvangin Herodi chuan Johana chu a haw ta hle mai a, tihhlum hial a duh a, nimahsela a thei mai si lo. Heroda pian cham lawm ni-ah Herodi chuan hun remchang tak a hmu ta hlauh va, a fanu chu lal leh a mi sawmte hmaah chuan a lamtir a; lal leh a chaw kilpuite chu an lawm ta em em a, lal chuan, “I duh apiang mi dil rawh,…ka ram chanve hial pawh ka pe ang che,” tiin chhia a chham bawk a.

    Heroda fanu chuan a nu hnenah chuan, “Engnge ka dil ang?” a ti a. A nu chuan, “Baptistu Johana lu le,” a lo ti a. Herodi fanu chu hman hmawh takin lal hnenah chuan a va lut ta nghal a, “Thlengin Baptistu Johana lu i mi pek nghal ka duh a ni,” tiin a dil a. Lal chuan a thutiam angin Johana lu chu a vengtu sipai pakhat a laktir (pawng lak) ta nghal a, Herodi fanu chu a pe a; ani chuan a nu hnenah a pe ta a. Van ram awm ve lohna Herodi khan van ram awmna Baptistu Johana nunna chu a sual thup nan lal leh sipai chakna hmangin a bei vak a, a ‘pawng lak’tihna a ni.

    Lal Isuan, Lk.13: 34-ah, “Aw Jerusalem, Jerusalem! zawlneiho thattu, i hnena an rawn tirhte lunga lo denghlum tu...” ti-a a sawi te, rinna Isua avanga Stephana leh vawiin thlenga martar(martyr)-a thi zawng zawngte kha Isua Krista ring lotuten an bei vak a, an pawng lak thin. He thua kan hriat tur pawimawh tak mai chu,  Isua tihhlumtirtu, Pilata hmaa “krawsah kheng bet rawh” titute, Stephena lunga deng hlumtute leh martyr tam zawkte kha Pathian ring tha inti em emte an ni tih i hre nawn fo ang u.

    Chhiartu unau duh tak, tunah pawh hian ngun takin han ngaihtuah la, thlarau mi (nun Krista neitu)-ten Chanchin Tha Thutak an puang chhuak mek zel a, chutianga thlarau mite thusawi chu, ‘zirtirna him lo, zirtirna hlauhawm’ ti-a mahni lawina Pawl thurin atangin emaw, mahni ngaih dana teh mai lovin, an thu sawi a dik leh dik loh Beroia khuaa mite angin Bible atangin i en dik zawk ang u hmiang.  Chutilochuan Pathian mite chu thiam loh chantira pawng lak tumin kan lo bei ve vak dah ang e. Lalpan a thute mal min sawmsak theuh rawh se…Amen. 

Src: Enna Arsi, Enna Corps.  ISSUE No. 15,  of  Dt. 29. April, 2012