A THO LEH TA

 — Laldinpuii,AYPSM

Mathaia 28:1-10
Isua Krista thawhlehna hi Kristiante thurin bulpui anih avangin ringtute nunah chuan a pawimawh hle a ni.

Isua Krista thawhleh chian zia ti langfiah turin amah an zalhna thlân ruak leh a zirtirte hnêna a inlar thu te kan chang thlan atangin kan hmu a ni. Thlan vêngtu sipaite leh puithiam lal pawh khan Isua Krista chu a tho leh ngei a ni tih an hai hauh lo. A tho leh tih an hriat chian êm avang khan dawt phuahchawpin Krista thawhlehna an zêp a ni. A tho leh ngei a ni tih hrechiang êm êm tu sipaite chu hlauvin an khur a, mitthi ang maiin an awm hial a nih kha.

Isua Krista thawhlehna hi tho leh satliah mai ni lovin, ‘thawhlehna thiltithei’ a ni tlat mai hian Pathian nung fapa anih zia a lanchian tir hle a ni.

 Kross a khenbeh anih hma khan a tho leh dawn a ni tih a sawi a, nimahsela a zirtirte ngei pawh khan an ring zo lo nge ni a thawhleh hnu a, an hnêna a inlâr khan ring ngam chiahlote pawh an awm tih kan bible-in min hrilh a, nimahsela amah ngei a ni tih an hriatchian hnu erawh chuan hlauva tawm-im a zirtirte kha lo zuang thovin thih ngamin an huaisen nghal a ni.

Nang leh kei hian chatuan nun kan neih theihna turin  mahni intidam thei reng mahse thiltithei lovin khenbehin a awm a, thih thlengin Kross-ah a nun a hlan. Nimahsela thihna chelh hlen rual lohin, a sawi ang ngeiin a tho leh ta.... Haleluiah!

Sualna avangin mihring chungah thlarau leh taksa thihna a lo awm tih bible-in min hrilh, chu thihna chu mitin chungah a awm a, tumahin kan pumpelh thei lo. Krista thawhlehna chuan chu thihna chu min hnehsak ta. A thawhlehna avangin vankai nun pekin kan awm a, chanchintha hril tur kan nei a, ringtuten thilhtihtheihna kan nei bawk a ni. Kan Lal Isuan, ‘thlamuang takin awm rawh u, keiin khawvel ka ngam ta’, a ti. A tho leh ngei ani tih tichiang turin thlarauvin tun hunah ngei pawh hian kan hnenah a inpuang thin. Isua Krista thawhlehna hrechiangtu apiangten Lalpa tân an nun an hlan a, mahni hrehawm pawisa lovin a thu an hril thin.

Unau duhtak, vawiinah hian Isua Krista chu i hlauh zawng zawng zawng lakah te, sualin kawng hrang hrang hmanga a salbehna lak atanga i lo zalen theihna turin i tan ngei a lo tho leh ta. Krista thawhlehna avang hian hnehna nun nangmahah pekin i awm tih inhria ang che. Pathianin hlauhna thlarau min pe lova, thiltihtheihna thlarau min pe zawk asin. Krista thawhlehna avanga kan chan hi a va ropui êm; chuvangin huai takin Krista thawhlehna avanga thiltihtheihna kan neih hi Lalpa tan i hmang chhuak ve ang u.

Lalpan malsawm rawh se.