Enna Corps Sipaite mi eng emaw zat chuan Dt. 14.April.2015 zing 6:30 khan Kelkang a Thlarau Thianghlim harhna chhim turin Bus trip hnihin an zin chhuak a, tlai lamah Kelkang khua hi tluang taka thlengin Pathian faka inkhawmna hun te neiin inkhawmna hmunah te an kal a, chhun lamah Bethel te neiin, inkhawm hlimawm tak mai neihna hmunah te an tel ve a, zai a nuamin hnehna puan chhuahna hun te an nei thin a, kal te chuan hlawkthlak an ti hle a ni.
Kelkang khuaa harhna thleng hi a rei tawh em em a, zantin inkhawmna hun hi neih thin a ni a, zoram hmun hrang hrang atangin tlawhtu an awm reng a, nikhat chhung ringawt pawhin mipui 5000 chuang te an thleng khawm a, he khua hi In tlemte chauh awmna ni mahse, Pathian hnathawh avangin ei leh barah harsatna engmah an tawk lo va, an hnianghnar em em zawk a, tui tih chauh lo chu an hnianghnar thawkhat hle niin a hmuna kal te chuan an sawi a ni.
Kohhran hrang hrangten Kelkang harhna chhim tur hian nitin maiin he hmun hi an pan thin a, chanchin mak tak tak sawi tur pawh a awm nual a ni. Tun dinhmunah hian Aizawl khawpui atangin nitin Bus 20 vel hmangin Kohhran hrang hrangte hian an tlawh thin a ni. Chawh rualin nitin mi 2000 atang 3000 velin an tlawh reng a ni. A kal te hian he harhna hi danglam an tih thu an sawi zel a, thenkhat chuan taksa damna beisei vang te, thlarau thianghlim pawlna nasa zawk chan belh duh vangte, in tuaithar duh vang tein he hmun hi an pan hlawm a ni.
Kan Corps atanga kal te pawhin hlawkthlak an tiin an hlim hle a, harhna chhima an kal hi vannei an in tiin hlawk an in ti hle a ni. Kelkangah hian zan hnih an riah hnuah Dt. 16.4.2015 khan tluang takin an lo haw thleng a, an lo thlen zan hian inkhawmna hlimawm tak kan Biak In-ah neih niin Sharing te neih a ni a, hlim taka inkhawmna hi neih niin zan dar 9 pelhah inkhawm hi an bang thei hram a ni.
